"Tesla Inc." (NASDAQ:TSLA) ABŞ-dakı oxşar endirimlərdən sonra Çin və Almaniya da daxil olmaqla bir neçə əsas bazarda öz elektrikli avtomobillərinin (EV) qiymətlərini endirdi. Şirkət, satışların azalması xüsusən də, daha sərfəli Çin elektrikli avtomobilləri səbəbilə artan rəqabətlə üzləşir.

Çində qiymət tənzimlənməsi bu gün "Tesla"-nın rəsmi saytında elan edilib və yenilənmiş "Model 3"-ün başlanğıc qiyməti 14 000 yuan (1 930 dollar) azalaraq 231 900 yuana (32 000 dollar) endirilib. Almaniyada "Model 3"-ün qiyməti 42 990 avrodan 40 990 avroya (43 670,75 dollar) endirilib.

Fins.az xəbər verir ki, "Tesla" sözçüsünə görə, bu qiymət dəyişiklikləri Avropa, Yaxın Şərq və Afrikanın bir sıra ölkələrində də baş verən daha geniş düzəlişlərin bir hissəsidir.

Həmçinin cümə günü "Tesla" "Model Y", "Model X" və "Model S" avtomobillərinin ABŞ qiymətlərini 2000 dollar aşağı salıb. Ertəsi gün şirkət ABŞ bazarında özünün "Full Self-Driving" sürücüyə yardım proqramının qiymətini əvvəlki 12 000 dollardan 8 000 dollara endirib.

"Tesla"-nın qiymətləri endirmək qərarı, ilk rübdə qlobal avtomobil tədarüklərində bildirilən azalmanın ardınca gəlir və bu, təxminən dörd il ərzində ilk belə enişdir. Elektrikli avtomobil istehsalçısı da bahalı məhsullara istehlakçı tələbini zəiflədən yüksək faiz dərəcələri ilə mübarizə aparır. Bunun əksinə olaraq, dünyanın ən böyük avtomobil bazarı olan Çindəki rəqiblər daha sərfəli modellər təklif edirlər.

Bu həftə sonu sözügedən məsələyə görə, CEO İlon Mask Hindistana səfərini təxirə saldı. Onun burada baş nazir Narendra Modi ilə görüşəcəyi və "Tesla"-nın Cənubi Asiya bazarına daxil olmasını müzakirə edəcəyi gözlənilirdi.

Xatırladaq ki, keçən bazar ertəsi Mask elan etdi ki, "Tesla"-nın qlobal işçi qüvvəsinin 10%-dən çoxu tədarüklərdə ilk illik azalma proqnozlaşdırıldığı üçün ixtisar olunacaq. Qeyd edək ki, bu, aprelin 5-də "Tesla"-nın sərfəli elektrik avtomobili yaratmaq planlarından imtina etdiyi və bunun əvəzinə robotaksis üzərində fokuslandığına dair yayılan xəbərlərdən sonra baş vermişdi. Mask isə xəbərə cavab olaraq bunun dezinformasiya olduğunu iddia etdi, lakin əlverişli model haqqında ətraflı məlumat vermədi və investorları tərəddüddə buraxdı.

"Tesla"-nın səhmləri bu il 40.8% ucuzlaşaraq əhəmiyyətli bir geriləmə yaşadı.