Finss.az - 2025-ci ildə Rusiyada yeni avtomobil markası Tenet istifadəyə verildi.

Bu marka altında, Çin avtomobil istehsalçısı Chery-nin modelləri yenidən adlandırılaraq buraxılacaq. İstehsalın əvvəlcə ikinci rübdə başlanması planlaşdırılsa da, proses yay ortalarına təxirə salındı. Lakin son açıqlamalara əsasən, istehsal yaxın günlərdə Kaluqa vilayətində yerləşən keçmiş Volkswagen zavodunda başlayacaq.

Kaluqa vilayəti qubernatoru Vladislav Şapşa bildirib ki, Tenet avtomobilləri hazırda AGR şirkətinin idarə etdiyi zavodda konveyerə çıxarılacaq. Yaxın vaxtlarda “yeni avtomobil modeli” təqdim olunacaq və bu model Tenet markasının ilk avtomobili olacaq.

Rəsmi olmayan məlumatlara görə, buraxılışa çıxacaq modellər arasında 32T krossoveri və ya Chery Tiggo 7L-nin yenidən marka edilmiş versiyası ola bilər. Eyni zamanda, iyunun əvvəllərində istehsala hazırlanmaqda olan 3XT adlı model barədə məlumat yayılıb. Bu model Tiggo 4-ün bazasında hazırlanıb və 1,5 və 1,6 litrlik mühərriklərlə təklif olunacaq. Avtomobillər mexaniki, robot və avtomatik sürət qutuları ilə təchiz ediləcək. SUV-lərin ön təkər ötürməsi olacaq.

İstehsal xəttinə həmçinin 31T modeli də daxil olacaq ki, bu da ehtimal edilir ki, Tiggo 8 Pro Max-in bazasında olacaq. Dördüncü model haqqında isə hələ ətraflı məlumat yoxdur. Qeyd etmək lazımdır ki, AGR şirkəti T4, CT4, T4 Pro, T4 Plus, T4 New və T4 Sport kimi bir sıra ticarət nişanlarını da qeydiyyatdan keçirib.

Tenet avtomobilləri ilkin olaraq “vidalı” və ya iri modullu montaj üsulu ilə yığılacaq. Sonrakı mərhələdə isə tam istehsal prosesi — qaynaq, boyama və s. — həyata keçiriləcək.

Qeyd edək ki, Tenet markasının adı Kristofer Nolanın eyniadlı filmindən götürülməyib. Bu ad Take Every New Experience Together ifadəsinin baş hərflərindən yaranan bəkronimdir və “Yeni təcrübələri birlikdə yaşamaq” mənasını verir. Markanın sloqanı isə “Tenet. Hərəkətlə yaşa”dır.