BANK

14 Noyabr
72

Yanvar-sentyabr aylarında Azərbaycanın bank sistemi yüksək likvidlik profisitinə malik olub

2019-cu il oktyabrın 1-nə Azərbaycan Mərkəzi Bankının (AMB) depozit əməliyyatları və notların yerləşdirilməsi vasitəsilə cəlb etdiyi vəsaitin qalığı 950 mln. manat təşkil edir.

“Hesabat dövründə Mərkəzi Bank milli valyutada sərbəst vəsaitlərin cəlb olunması üzrə 40 depozit hərracı, notların yerləşdirilməsi üzrə 40 hərrac keçirib. Depozit əməliyyatları və notların yerləşdirilməsi vasitəsilə cəlb edilən vəsaitin cəmi qalığı 950 mln. manat olub”, - deyə AMB-nin 2019-cu ilin yanvar-sentyabr ayları üzrə Pul siyasəti icmalında bildirilir.

Sentyabr ayının sonuna depozit əməliyyatları ilə cəlb edilmiş vəsaitlər 250 mln. manat, notların yerləşdirilməsi nəticəsində cəlb edilən vəsaitlər isə 700 mln. manat təşkil edib.

Depozit əməliyyatları vasitəsilə vəsaitlər 14 gün müddətinə cəlb edilib, notlar isə 28 və 84 gün müddətinə yerləşdirilib.

1 oktyabr tarixinə depozit hərracları və notların yerləşdirilməsi vasitəsilə cəlb edilən vəsaitin qalığı ilin əvvəli ilə müqayisədə 44.4% azalıb.

Mərkəzi Bank qeyd edir ki, hesabat dövründə bank sistemi yüksək likvidlik profisitinə malik olub. “Bu da AMB-nin həyata keçirdiyi sterilizasiya əməliyyatlarına yüksək tələbi şərtləndirib”, - deyə icmalda vurğulanır.