Finss.az - Asiya İnkişaf Bankının (AİB) Mərkəzi və Qərbi Asiya Departamentinin Regional Əməkdaşlıq və Əməliyyatların Koordinasiyası şöbəsinin direktoru Ləzizə Sabırova, "Transkaspiyalı Əlaqəlilik: Nəqliyyat və Enerji Dəhlizlərinin Açılması" mövzusunda keçirilən seminar zamanı Orta Dəhlizin Mərkəzi Asiyanın zəngin təbii resurslarının səmərəli istifadəsi üçün yeni imkanlar yaradacağını açıqlayıb.

Seminar, 58-ci AİB İllik Yığıncağı çərçivəsində təşkil edilib.

Sabırova bildirib ki, Asiya İnkişaf Bankı tərəfindən həyata keçirilən CAREC proqramı çərçivəsində altı əsas dəhlizdən biri olan Orta Dəhliz, xüsusilə, Şərq və Qərb arasında alternativ bir nəqliyyat marşuru olaraq önə çıxır. O, bu dəhlizin potensialının tam istifadə edilmədiyini vurğulayıb: "Hazırda, enerji ilə əlaqəsi olmayan xarici ticarət axınlarının yalnız 10%-i bu dəhliz vasitəsilə keçir. Bu isə onun potensialının çox aşağı səviyyədə olduğunu göstərir."

Ləzizə Sabırova Orta Dəhlizin daha çox inkişaf etdirilməsi və bu marşrutun zəngin təbii resursların daşınmasında istifadə olunması ilə Mərkəzi Asiyanın regional və qlobal ticarət əlaqələrinin gücləndiriləcəyini qeyd edib. O, əlavə edib ki, bu addımlar, həmçinin regionun daha sıx bir şəkildə qlobal tədarük zəncirlərinə inteqrasiyasını təmin edəcək.

Bu inkişaflar, xüsusilə, enerji resurslarının önəmli ixracatçıları olan ölkələr üçün böyük əhəmiyyət kəsb edir. Orta Dəhlizin daha da inkişafı, nəinki Mərkəzi Asiyanın iqtisadiyyatı üçün, həm də qlobal enerji bazarları üçün mühüm nəticələr verə bilər.