Finss.az - İtaliya Bankı Rusiyanı İtaliya bank sisteminə əhəmiyyətli risk yaradan ölkələr siyahısına daxil edib.

Siyahı Avropa İqtisadi Zonası xaricində yerləşən və İtaliya banklarının aktiv iştirak etdiyi ölkələr əsasında tərtib olunub.

Reqlamentə əsasən, bu addım Avropa Sistemli Risklər Şurasının (ESRB) tövsiyəsinə uyğun olaraq atılıb. Siyahıya həmçinin ABŞ, Böyük Britaniya və İsveçrə də daxil edilib. Bu ölkələr Avropa maliyyə sabitliyi üçün sistem əhəmiyyətli hesab olunur və onların vəziyyəti daimi nəzarətdədir.

Siyahı hazırlanarkən bankların kredit portfeli, risk dərəcəsi və problemli aktivlərin payı kimi meyarlar əsas götürülüb. Rusiyada fəaliyyət göstərən əsas İtaliya bankları Intesa Sanpaolo və UniCredit artıq bazardan çıxmaq üzrədir. Intesa artıq 2023-cü ildə Moskva nümayəndəliyini bağlamağa qərar verib, UniCredit isə Avropa Məhkəməsində çıxış müddətinə dair qərara etiraz etsə də, İtaliya hökumətinin təzyiqi ilə üzləşib.

Reuters-in məlumatına görə, 2025-ci ilin mayında BƏƏ şirkətləri UniCredit-in Rusiyadakı aktivlərini almaq üçün təklif irəli sürüb.