Niderlandın ING bank qrupu yaxın illər üçün Azərbaycanda ümumdaxili məhsul (ÜDM) artımı ilə bağlı proqnozlarını açıqlayıb.

Finss.az xəbər verir ki, sənədə əsasən, 2025-ci ildə ölkə iqtisadiyyatı 1,5%, 2026-cı ildə 2,8% artacaq, 2027-ci ildə isə artım tempinin təxminən 2%-ə qədər yavaşlayacağı gözlənilir.

ING-nin qiymətləndirməsinə görə, 2025-ci ilin üçüncü rübündə ÜDM artımı sabit qalacaq, dördüncü rübdə isə 3%-ə qədər sürətlənəcək.

Azərbaycan Dövlət Statistika Komitəsinin məlumatına əsasən, 2025-ci ilin yanvar–avqust aylarında ölkədə fəaliyyət göstərən müəssisə, təşkilat və fərdi sahibkarlar tərəfindən 83 milyard manatlıq ÜDM istehsal edilib, bu da 2024-cü ilin eyni dövrü ilə müqayisədə 1% artım deməkdir.

Hesabat dövründə neft-qaz sektorunda əlavə dəyər 2,1% azalıb, qeyri-neft-qaz sektorunda isə 2,6% artım qeydə alınıb.

Əlavə dəyərin strukturunda 34,9% sənaye, 10,3% ticarət və nəqliyyat vasitələrinin təmiri, 7,1% nəqliyyat və anbar təsərrüfatı, 6,3% kənd, meşə təsərrüfatı və balıqçılıq, 6,3% tikinti, 2,8% turistlərin yerləşdirilməsi və ictimai iaşə, 1,8% informasiya və rabitə, 20,7% isə digər sahələr təşkil edib.

Məhsul və idxal üzrə xalis vergilər ÜDM-in 9,8%-ni təşkil edib, adambaşına düşən ÜDM isə 8111,3 manat olub.

Fuad Mədətov
Finss.az