Finss.az - Nyu-Yorkun Comex birjasında mis fyuçerslərinin qiymətləri ABŞ prezidenti Donald Trampın mis idxalına 50% rüsum tətbiq edəcəyi barədə açıqlamasından sonra çərşənbə axşamı günü 13% artaraq 1969-cu ildən bəri ən yüksək səviyyəyə yüksəldi.

Fyuçerslər ticarətin bağlanması zamanı funt başına 5,69 dollara qədər qalxaraq yeni tarixi maksimum qeydə aldı. Tramp kabinet iclasında "Bu gün mislə məşğul olacağıq" deyərək, yüksək rüsumun zəruri olduğunu vurğuladı. Ticarət naziri Hovard Latnik rüsumun ay sonu və ya avqustun əvvəlində qüvvəyə minəcəyini bildirdi.

Citi analitiklərinin fikrincə, rüsumun tətbiqi ilə bağlı rəsmi təsdiq yaxın həftələrdə veriləcək və tədbir 30 gün ərzində həyata keçiriləcək. ANZ-in baş analitiki Daniel Hains isə Nyu-York qiymətlərinin Londondakı metal qiymətlərindən 25% yüksək olduğunu və vəziyyəti misli görünməmiş adlandırıb.

Trade Data Monitor məlumatlarına əsasən, ABŞ-ın mis idxalının 70%-i Çilidən gəlir. Kanada və Peru isə ən böyük digər təchizatçılar sırasındadır.