Finss.az xəbər verir ki, “Goldman Sachs” Hörmüz boğazında mümkün fasilə səbəbindən qlobal enerji təchizatında artan risklərə diqqət çəkib. Bank bu vəziyyətin neft və təbii qaz qiymətlərində ciddi artımlara səbəb ola biləcəyini bəyan edib.

Bank Brent markalı neftin bir barelinin qiymətinin qısa müddət ərzində 110 dollara qədər qalxa biləcəyini proqnozlaşdırır. Bu ssenari Hörmüz boğazından neft axınının bir ay ərzində iki dəfə azaldılması və daha sonra 11 ay ərzində 10 faiz aşağı qalması halında tətbiq edilir.

Goldman, bu artımdan sonra qiymətlərin orta səviyyəyə qayıdacağını və Brent markalı neftin 2025-ci ilin dördüncü rübündə orta hesabla 95 dollar civarında olacağını bildirir.

Goldman həmçinin bildirib ki, məhdud likvidliyinə baxmayaraq, proqnoz bazarları hazırda İranın 2025-ci ildə Hörmüz boğazını bağlayacağı ehtimalını 52 faiz qiymətləndirir. Bundan əlavə, bank qeyd edib ki, İranın gündəlik neft tədarükünün 1,75 milyon barrel azalması Brent neftinin qiymətini 90 dollar civarına çatdıra bilər.