Fins.az xəbər verir ki, Tesla Inc 2025-ci ilin üçüncü rübündə elektrik avtomobillərinin tədarükündə yeni rekorda imza atıb. Şirkətdən verilən məlumata görə, bu dövrdə ümumilikdə 497,099 elektrik avtomobili müştərilərə çatdırılıb ki, bu da ötən ilin eyni dövrü ilə müqayisədə 7,4% artım deməkdir.

Tesla-nın büdcə seqmentinə daxil olan məşhur Model 3 və Model Y avtomobillərinin satışı 481,166 ədəd təşkil edib. Digər modellərin, o cümlədən Model S, Model X və Cybertruck kimi premium və xüsusi modellərin satış sayı isə 15,933 ədəd olub.

Tədarük göstəriciləri analitiklərin proqnozlarını üstələyib. Visible Alpha tərəfindən aparılan sorğuda analitiklər orta hesabla 443,919, FactSet respondentləri 456,000 və Bloomberg analitikləri isə 439,612 avtomobil tədarükü gözləyirdi.

Qeyd edək ki, ötən ilin eyni dövründə Tesla 462,890 ədəd avtomobil tədarük etmişdi. Yeni nəticələr, xüsusilə də qlobal avtomobil bazarındakı qeyri-müəyyənliklər fonunda şirkətin rəqabət üstünlüyünü və istehsal gücünü bir daha nümayiş etdirir.