Finss.az xəbər verir ki, ABŞ səhm indeksləri çərşənbə axşamı süni intellektlə əlaqəli şirkətlərin qiymətlərinin həddindən artıq dəyərləndirilməsi ilə bağlı narahatlıqlar fonunda aşağı düşüb.

Palantir Technologies şirkətinin səhmləri 7,9% ucuzlaşıb. Şirkət dördüncü rüb üçün gəlirlərinin analitik gözləntilərini üstələyəcəyini proqnozlaşdırsa da, investorlar ilin əvvəlindən bəri səhmlərin 2,5 dəfədən çox bahalaşmasının dayanıqlılığına şübhə ilə yanaşırlar.

Süni intellekt sektorunun aparıcı şirkətləri də itkilərlə üzləşib. Nvidia Corp. 4%, Advanced Micro Devices (AMD) 3,7%, Oracle Corp. 3,8% və Micron Technology Inc. isə 7,1% dəyər itirib.

Analitiklər bildirirlər ki, SP 500 indeksində iştirak edən şirkətlərin qiymət–mənfəət (P/E) nisbəti 23 dəfəni keçib, bu isə 2000-ci ildən bəri ən yüksək səviyyələrdən biridir. Mütəxəssislərin fikrincə, bu göstərici bazarda korreksiya gözləntilərini artırır.

Reuters yazır ki, aparıcı bankların rəhbərləri də bu barədə xəbərdarlıq ediblər. Goldman Sachs-ın rəhbəri David Solomon və Morgan Stanley-dən Ted Peek ABŞ bazarlarında 10–20% arası eniş ehtimalını istisna etmirlər.

Ekspertlər hesab edirlər ki, yaxın həftələrdə Wall Street bazarlarında volatillik artacaq və investorlar AI sektorundakı real mənfəət göstəricilərinə daha diqqətlə yanaşacaqlar.