Finss.az - Milli Məclisin 2025-ci il yaz sessiyasının ilk iclasında deputat Bəhruz Məhərrəmov, Azərbaycan cəmiyyətində bəzi dəyərlərin qorunması mövzusunda ciddi narahatlıq ifadə edib. Deputat qeyd edib ki, qloballaşan dövrdə milli kimliklərə qarşı təcavüzün və mənəvi işğalın olduğu bir şəraitdə, Azərbaycan öz dəyərlərini qorumaqda müvəffəqiyyət əldə edir.

Bəhruz Məhərrəmov, cəmiyyətdə bəzi məsələlərə yanaşma tərzində qüsurlar olduğunu vurğulayaraq, milli dəyərlərin yalnız ənənələrdən, musiqidən və mətbəxdən ibarət olmadığını, eyni zamanda tarixən formalaşan idealların da bu dəyərlərə daxil olduğunu bildirdi. O, müəllim idealının da milli dəyərlər arasında olduğunu və sosial mediada bu idealların qorunmadığını diqqətə çatdırdı.

Millət vəkili, hal-hazırda müəllimlərin linç obyektinə çevrildiyini, onların işindəki hər hansı nöqsanların ictimailəşdirilməsinin müəllim adının zədələnməsinə səbəb olduğunu qeyd etdi. Məhərrəmov, belə halların cəmiyyətdə ehtiramın azalmasına gətirib çıxardığını, buna görə də müəllim adının qanunvericilik səviyyəsində qorunmasının vacib olduğunu vurğuladı.

Zemfira Ms
Finss.az