Finss.az - Apple Inc.-də baş əməliyyat direktoru (COO) Ceff Uilyams onillik xidmətindən sonra vəzifəsini tərk edir.

Onun yerini bu ayın sonunda şirkətin təchizat zənciri üzrə aparıcı memarı və əməliyyatlar üzrə baş vitse-prezidenti Sabih Xan tutacaq.

Apple-ın rəsmi açıqlamasına görə, bu dəyişiklik uzun müddətdir planlaşdırılan səlahiyyətlərin ötürülməsi prosesinin bir hissəsidir. 62 yaşlı Uilyams COO vəzifəsini tərk etdikdən sonra dizayn komandası, Apple Watch və Health layihələrinə rəhbərlik etməyə davam edəcək, lakin ilin sonlarında təqaüdə çıxacaq.

Sabih Xan 30 ildir Apple-da çalışır və 2019-cu ildən əməliyyatlar üzrə baş vitse-prezident kimi fəaliyyət göstərir. O, şirkətin qlobal təchizat zəncirlərinə məsuldur.

Apple üçün strateji əhəmiyyət kəsb edən bu rəhbərlik dəyişikliyi, həmçinin ABŞ-Çin ticarət gərginliyi fonunda şirkətin istehsal siyasətindəki dəyişikliklərə də təsir göstərə bilər. Xatırladaq ki, ABŞ prezidenti Donald Tramp iPhone istehsalının ölkə xaricində aparılması halında tarif tətbiq etmək təhlükəsi ilə çıxış etmişdi.