Finss.az - Azərbaycan Dövlət Neft Fondu (ARDNF) İtaliyada günəş enerjisi sektorunda böyük investisiya addımı atır.

Fond ABŞ-ın "Enfinity Global Inc." şirkətinin 402 meqavatlıq günəş enerjisi portfelində 49% pay əldə edəcək. Sözügedən portfelə İtaliyanın Latsio və Emiliya-Romanya bölgələrində 14 günəş elektrik stansiyası daxildir.

Layihələr həm hazırda fəaliyyət göstərir, həm də inşası davam edir və uzunmüddətli enerji alqı-satqı müqavilələri ilə təmin olunub. "Enfinity" şirkəti nəzarət payını qoruyacaq və investisiya İtaliyada yeni bərpa olunan enerji layihələrinin maliyyələşdirilməsinə şərait yaradacaq.

ARDNF-nın icraçı direktoru İsrafil Məmmədov bildirib ki, bu, İtaliyada və Avropada bərpa olunan enerji sahəsində mövcudluğu genişləndirmək üçün atılan ilk strateji addımdır. Hazırda Fondun ümumi investisiya portfeli 60 milyard ABŞ dollarını ötür və infrastruktur, daşınmaz əmlak, səhmlər və digər aktivləri əhatə edir.

Bu əməkdaşlıq ARDNF-nın enerji sektorunda diversifikasiya strategiyasının vacib hissəsi olmaqla, bərpa olunan enerji bazarında potensialın artırılması məqsədini güdür.