Azərbaycanda fəaliyyət göstərən 31 bank bu ilin yanvar-sentyabr aylarında 479,7 milyon manat xalis mənfəət əldə edib ki, bu da onların oktyabrın 1-nə malik olduqları 26 163,6 milyon manat məbləğində aktivlərin 1,83%-i qədərdir. Fins.az Renkinq-ə istinadən xəbər verir ki, ayrı-banklarda isə sözügedən nisbət fərqlidir. Belə ki, bu ilin ilk 9 ayını mənfəətlə başa vurmuş 19 bank arasında aktivlərindən ən yaxşı istifadə edəni "Bank Avrasiya" olub. Bu bankın əldə etdiyi mənfəət aktivlərinin 7,17%-ni təşkil edib.
Ölkənin ən böyük bankı olan "Azərbaycan Beynəlxalq Bankı" isə yanvar-sentyabrda aktivlərinin 6,61%-i qədər mənfəət əldə edib və fəaliyyət effektivliyinə görə, 2-ci yeri tutub.
3-cü yerə isə 2,63%-lik göstərici ilə "Naxçıvan Bank" sahib olub. Baxmayaraq ki, ölkənin yeganə regional bankı aktivlərinin məbləğinə görə, 31 bank arasında yalnız İran və Pakistan Milli Banklarının Bakı filiallarını üstələyir.
Mənfəətlə işləyən qalan 16 bankdan 7-də sözügedən göstərici 1-2% arasında, 9-da isə 0-1% arasında dəyişir.