Finss.az - 2025-ci ilin yanvar-sentyabr aylarında Azərbaycanda fəaliyyət göstərən 16 sığorta şirkəti ümumilikdə 1 milyard 157 milyon manat sığorta haqqı toplayıb.

Bu göstərici ötən ilin eyni dövrü ilə müqayisədə 13% artım deməkdir.

Bu barədə məlumatı Azərbaycan Mərkəzi Bankı (AMB) yayıb. Hesabata əsasən, sığorta şirkətləri tərəfindən həyata keçirilən sığorta ödənişlərinin məbləği də artaraq 683 milyon 896 min manat olub. Ödənişlərdə illik artım 23,5% təşkil edib.

Müqayisə üçün, 2024-cü ilin yanvar-sentyabr aylarında sığorta yığımlarının ümumi həcmi 1 milyard 24 milyon manat, ödənişlərin həcmi isə 553 milyon 746 min manat idi.

Mütəxəssislərin fikrincə, sığorta bazarındakı artım ölkə iqtisadiyyatındakı canlanma, həmçinin vətəndaşların icbari və könüllü sığorta növlərinə marağının yüksəlməsi ilə əlaqədardır.

Artım tendensiyası həyat sığortası, avtonəqliyyat sığortası və əmlak sığortası kimi istiqamətlərdə daha çox müşahidə olunur. Ekspertlər bildirirlər ki, sığorta bazarının dayanıqlı inkişafı üçün rəqəmsal xidmətlərin genişlənməsi və yeni məhsulların tətbiqi mühüm rol oynayacaq.