Bakıda təkrar mənzil bazarında yeni və köhnə tikililər üzrə qiymət səviyyələri arasında əhəmiyyətli fərqlər müşahidə olunur.

Bu barədə Finss.az-a Azərbaycan Qiymətləndiricilər Palatasından məlumat verilib.

Məlumata görə, 2025-ci ilin əvvəlində yeni tikililərdə 1 kvadrat metr üçün orta qiymət köhnə binalara nisbətən daha yüksək olub. Bəzi məlumatlara görə, bu göstərici yeni tikililər üçün orta hesabla 2167 AZN/kv.m, köhnə tikililər üçün isə təxminən 1800–1900 AZN/kv.m civarında dəyişib.

Bu fərqin yaranmasında bir neçə amil rol oynayır. İlk növbədə, yeni binalar daha müasir infrastruktur və yaşayış şəraiti ilə seçilir, eyni zamanda alıcıların tələbatı da bu mənzil kateqoriyasına yönəlir. Digər tərəfdən, köhnə binaların bir hissəsində – xüsusilə istismar müddəti uzun olan binalarda – ipoteka ilə satış imkanlarının məhdud olması həmin mənzillərin qiymət artımını ləngidir.

Mütəxəssislərin bildirdiyinə görə, bu səbəbdən 2024–2025-ci illər ərzində təkrar bazarda yeni tikililərin qiymətləri köhnə mənzillərlə müqayisədə daha sürətlə artıb. Belə ki, yeni tikililərdə illik qiymət artımı təxminən 14–15%, köhnə tikililərdə isə 10–11% səviyyəsində qeydə alınıb.

Qiymət dinamikasındakı bu fərqlər, gələcəkdə də yeni tikililərin bazarda üstünlük təşkil etməyə davam edəcəyini göstərir.

Fuad Mədətov
Finss.az