Finss.az - Azərbaycan Qiymətləndiricilər Palatasının 2024-cü ilin aprelindən 2025-ci ilin aprelinə qədər olan dövrü əhatə edən hesabatına görə, Bakının təkrar mənzil bazarında satış üçün ümumi təklif həcmi 17%-dən çox artıb.

2025-ci ilin sonuna yaxın satışa çıxarılan mənzillərin sayı 7000-i ötüb.

Təklif portfelində həm yeni tikililər, həm də köhnə tikililər yer alır. Lakin köhnə binalardakı mənzillərin payı artıb, bu isə 1970-ci ildən əvvəl tikilmiş mənzillərə ipoteka məhdudiyyətlərinin tətbiqindən qaynaqlanır. Yeni tikililərdə təklif həcmi isə bazara davamlı yeni layihələr daxil olduğu üçün yüksək səviyyədə saxlanılır.

Qiymət baxımından, 2024-cü ilin aprelində 1 kvadrat metr üçün orta qiymət təxminən 2000 AZN təşkil edirdi. 2025-ci ilin aprelində bu rəqəm yeni tikililərdə 2300–2400 AZN, köhnə tikililərdə isə 2000–2050 AZN səviyyəsində olub. Beləliklə, bir il ərzində yeni tikililərdə qiymət artımı 15–17%, köhnə tikililərdə isə 10–12% olub ki, bu da ölkədəki illik inflyasiya tempini üstələyir.

Bazarda satılan mənzillərin orta sahəsi 85-100 kv.m civarında dəyişir. Orta mənzil qiyməti isə 2025-ci ilin aprelində 180-200 min AZN aralığında olub ki, bu da təkrar bazarda artan aktivliyi və qiymətləri göstərir.

Palatanın hesabatına əsasən, 2025-ci ilin ilk rübündə mənzil qiymətlərində aylıq təxminən 1%-lik, illik isə 10-15%-lik artım müşahidə olunub. Bu göstəricilər, Bakının təkrar mənzil bazarında həm qiymətlərin, həm də təklifin canlandığını nümayiş etdirir.