Avqustun 30-da Dövlət Turizm Agentliyi tərəfindən Şüvəlan qəsəbəsində təşkil olunan mediatur zamanı yay mövsümünün ilkin nəticələri açıqlanıb.

Finss.az xəbər verir ki, tədbirdə çıxış edən Agentliyin sədrinin müşaviri, Aparat rəhbərinin vəzifəsini müvəqqəti icra edən Kənan Quluzadə bildirib ki, bu il daxili və xarici turizmdə artım müşahidə olunur.

Onun sözlərinə görə, ötən il ölkədə daxili səfərlərin sayı 23 milyon nəfər olubsa, 2025-ci ilin sonuna qədər bu göstəricinin 25 milyona yaxınlaşacağı gözlənilir:

"Bu səfərlərin təxminən 40 faizi yay mövsümünün payına düşür. Yəni 10 milyona yaxın daxili səfər məhz iyun-sentyabr aylarında reallaşır. Bu, həm yerli turistlərin, həm də əcnəbi qonaqların ən çox seçim etdiyi dövrdür".

Xarici turistlərin statistikası

K.Quluzadə qeyd edib ki, 2025-ci ilin yanvar-iyul aylarında Azərbaycana 1 milyon 478 min xarici vətəndaş səfər edib. Avqust ayının nəticələri ilə bu rəqəmin 1,7 milyonu ötəcəyi gözlənilir.

Onun sözlərinə görə, xarici turistlərin 32 faizi, yəni hər üç nəfərdən biri, məhz yay aylarında ölkəyə gəlir:

"Yay mövsümü Azərbaycanın pik mövsümüdür. İyun-avqust aylarında həm daxili, həm də xarici turistlər üzrə ən yüksək göstəricilər qeydə alınır".

Geosiyasi təsirlər və azalmalar

Agentlik rəsmisi əlavə edib ki, ötən illə müqayisədə ölkəyə gələn turistlərin sayında 1-2 faiz azalma var:

"Əsas bazarlarımız olan Rusiya və Hindistandan gələn turistlərin sayında 12-14 faizlik azalma müşahidə olunur. Bunun səbəbi regiondakı geosiyasi dəyişikliklər və münaqişələrlə bağlıdır. Yaxın Şərqdəki qarşıdurmalar da uçuşların vaxtında həyata keçirilməsinə və səfərlərə təsir göstərib".

Bununla yanaşı, Pakistan və Çin istiqamətində artım qeydə alınıb. K.Quluzadə bildirib ki, hazırda Çin bazarı prioritet istiqamətlərdən biridir və bu məqsədlə “China Ready” proqramı işə salınıb. Körfəz ölkələri, İsrail və Türkiyədən gələn turistlərin sayında da müsbət dinamika müşahidə olunur.

Turizm sənayesinin potensialı

K.Quluzadə onu da qeyd edib ki, Azərbaycanın turizm sektoru daha böyük turist axınını qarşılamağa tam hazırdır:

"Turizm agentliklərimiz və operatorlarımız imkan baxımından bundan iki, hətta üç dəfə çox turisti qəbul edə bilər. Ölkədə xidmət sahəsi ilə bağlı ciddi problem yoxdur, əksinə, sektorda yeni iş yerləri açılır. Turizm çox həssas sahədir, amma eyni zamanda ən tez bərpa olunan sahələrdən biridir".

K.Quluzadə əlavə edib ki, hazırkı göstəricilər 2019-cu ilin rekordlarına yaxınlaşır. Turistlərin ümumi sayı bir qədər az olsa da, gəlirlər və məşğulluq baxımından 2019-cu il səviyyəsinə çatmaq mümkün olub.

Fuad Mədətov
Finss.az